Бенедыкт XVI прызначыў італьянку Фламінью Джаванелі намесніцай сакратара Папскай рады "Iustitia et Pax” ("Справядлівасць і мір”). Гэтая свецкая палітолаг працуе ў згаданай кангрэгацыі 36 гадоў. У апошні час яна адказвала за падтрыманне сувязяў з сацыяльнымі камісіямі епіскапатаў па ўсім свеце і, асабліва, у Еўропе.
Фламінья Джаванелі – не першая жанчына, якая ўваходзіць у кіраўнічы орган ватыканскай кангрэгацыі.
З 1966 па 1977 год аўстралійка Розмары Гольдзі працавала намесніцай сакратара Папскай рады па свецкіх справах. У цяперашні час манашка Разана Энрыка з ордэна дачок Марыі-дапаможніцы (салезіянак) займае такую ж кіраўнічую пасаду ў Кангрэгацыі для інстытутаў асвячанага жыцця і таварыстваў апостальскага жыцця.
Ватыканскае радыё адзначае, што прызначэнне Фламіньі Джаванелі пацвярджае вялікі давер да жанчын з боку Каталіцкай Царквы і Бенедыкта XVI. У камюніке Папскай рады "Iustitia et Pax” згадваюцца словы папы Яна-Паўла ІІ: "…неабходна забяспечыць больш шырокі і значны ўдзел жанчын у жыцці Касцёла і ў развіцці грамадства”.