Выдатнага часу сутак, дарагія сябры!
Сёння пачынаю з невясёлага ліста.
Наша даўняя слухачка з Магілёва Яўгенія Цюркіна ў разгубленым стане. Так вынікае з яе нядаўняга ліста. Спадарыня Цюркіна не можа злавіць перадачы а 16.30 і 19.30 паводле менскага часу. З рэтрансляцый а дваццатай гадзіне наша прыхільніца даведалася, што гэтыя кароткахвалевыя выпускі па-ранейшаму існуюць.
Аднак у яе склалася ўражанне, што “перадач увогуле няма”. На думку спадарыні Цюркінай, трансляцыі Польскага радыё для замежжа на кароткіх хвалях у Магілёве глушацца.
Так, наша прыхільніца мае рацыю. Але часткова. Перадач няма. Праўда, выключна на тых хвалях, якія выкарыстоўваліся Беларускай рэдакцыяй у зімовы перыяд. Мы перайшлі не толькі на іншыя частоты, а яшчэ і дыяпазоны памянялі. Раней вяліся трансляцыі на 41 і 49 метрах. З 29 сакавіка мы працуем на 25 і на 31 метры. Нагадаю, а 16.30 менскага часу Варшаву чутно на частотах 9440 і 11975 кілагерц. А 19.30 Польскае радыё для замежжа можна прыняць на 9670 кілагерцах.
Яўгенія Цюркіна расчаравана піша: “У красавіку мне ўдалося пачуць перадачы з Варшавы толькі 2 разы. Выключна а дваццатай гадзіне і толькі бываючы на лецішчы”. Натуральна, што зрабіць гэта ўдалося з вялікімі намаганнямі. Наша сяброўка прымала перадачу, размясціўшы прыёмнік у сабачай будцы. А што зробіш? У іншых закуточках дачы прыёму не было. На ўсходзе Беларусі чутнасць на 1557 кілагерцах вымагае часам вось такіх нестандартных рашэнняў. Галоўнае – якасна паслухаць праграму. Да слова, рапарты Яўгеніі Цюркінай сведчаць, што нашай прыхільніцы ўдалося прыняць выпускі а 20.00 на неблагім узроўні. Абедзве рэтрансляцыі атрымалі па “чацвёрцы”.
Аднак не толькі прыём ці, дакладней, ягоная адсутнасць хвалюе магіляўчанку. Спадарыня Цюркіна піша: “...я цяпер працую над гендэрнай віктарынай”. Наша сяброўка паабяцала праз нейкі час прыслаць спіс выдатных дзяячак з розных краін. Што ж, буду вельмі чакаць!
Яніну Дзямешчанку з Віцебска таксама зацікавіў гендэрны конкурс. Яна прыслала адказ. Гэта вялікая праца. Прапановы выдатных жанчын сур’ёзна абгрунтаваныя. Выглядае на тое, што наша сяброўка нямала пасядзела ў бібліятэцы, каб напісаць свой спіс знакамітых прадстаўніц жаночага полу.
Між іншым, шаноўныя слухачы, пасля завяршэння конкурсу я на аснове вашых прапаноў складу рэйтынг выбітных жанчын. Ён прагучыць у эфіры. Рэйтынг можна будзе знайсці на двух сайтах:
www.schoolgender.do.am i
www.gender.do.am. Гэта – Інтэрнет-старонкі міжнароднай гендэрнай праграмы “Крок да роўнасці”, якая фундуе ўзнагароды.
А зараз – традыцыйна – я прачытаю ўмовы нашага конкурсу.
Назавіце самаменш па пяць прозвішчаў славутых беларусак, вядомых полек і знакамітых жанчын з любых іншых краін. Абгрунтуйце свой выбар. Шаноўныя сябры! Свае прапановы выбітных жанчын дасылайце не пазней за 31 траўня 2009 года. У чэрвені будуць падведзеныя вынікі. Пераможцы атрымаюць цікавыя ўзнагароды. Між іншым, ужо вядома, што ўяўляе сабой гран-пры конкурсу. Гэта – каштоўная рэч. А, дакладней, радыёпрыёмнік “Grundig” з рознымі дыяпазонамі, у тым ліку з кароткімі хвалямі. За такую высакаякасную апаратуру варта пазмагацца!
Дарэчы, пра прымачы. Ці, дакладней, дзе іх можна знайсці. Наш слухач з Горадні Іван Раткевіч піша пра адзін з апошніх нашых конкурсаў: “...Вы гаварылі , што аднаму пераможцу віктарыны даслалі добры новы радыёпрыёмнік “Grundig”. Пытанне: дзе яго (нават у Польшчы) можна набыць і колькі ён каштуе?”.
Адказваю. Фірма “Grundig” выпускае мноства прымачоў. Розныя маркі каштуюць неаднолькава. Напрыклад, “Grundig Yacht Boy 80” я купіў за 499 злотых. Аднак можна знайсці тэхніку і ўдвая таннейшую. Скажам, “Grundig Yacht Boy 50” ацэньваецца амаль у 188 злотых. Усё залежыць ад функцыянальных здольнасцяў мадэлі.
Купіць прыёмнік “Grundig” у Беларусі складанавата. Падазраю, што нават Інтэрнет-крамы нам тут асабліва не дапамогуць. Нейкія прапановы мае расійскі электронны гандаль. У Польшчы таксама праблемна з набыццём прыёмнікаў. Няшмат магазінаў прадае тэхніку, здатную лавіць кароткія хвалі. Радыёпрыёмнікі, якія ў апошніх конкурсах выйгралі нашы прызёры, купляліся ў краме “Saturn” у гданьскім гандлёвым цэнтры “Galeria Bałtycka”.
Калі будзе новая інфармацыя пра магчымасці купіць “Grundig” у Польшчы, то я, канешне, паведамлю.
Шаноўныя сябры! Я сардэчна ўдзячны за ўсе прысланыя лісты. З нецярпеннем чакаю ад вас новую карэспандэнцыю на самыя розныя тэмы.
Калі ласка, пішыце на наступны адрас Польскага радыё для замежжа: а/с 45, г. Віцебск, 210015, Беларусь.
Свае лісты вы можаце таксама накіроўваць непасрэдна ў рэдакцыю. Адрас гучыць так: Беларуская служба Польскага радыё для замежжа, P. О. Box 46, 00-977 Warszawa, Польшча.
Нашы палескія слухачы могуць адпраўляць свае пісьмы на адрас: абаненцкая скрынка 28/78, г. Вінніца, 21027, Украіна.
З намі таксама можна вельмі аператыўна кантактаваць па электроннай пошце. Рэдакцыйны e-mail гучыць так:
by@polskieradio.pl.
