Шчыра вітаю вас, дарагія сябры!
Я дзякую аўтарам лістоў, рапартаў і музычных заявак, якія прыйшлі на віцебскі адрас Польскага радыё для замежжа.
Гарадзенец Іван Раткевіч піша ў сваім лісце: “Прымач у мяне стары – “VEF-202”, але працуе добра”. На гэтай апаратуры наш слухач прымае перадачы з Варшавы на кароткіх і доўгіх хвалях а 16.30 паводле менскага часу. “Вас добра чутно,” – канстатуе спадар Раткевіч.
Нас актыўна слухае і магіляўчанка Яўгенія Цюркіна. З пачатку новага вяшчальнага сезона яна прыслала некалькі рапартаў.
Разгледжу некаторыя з іх.
24 і 26 красавіка спадарыня Цюркіна слухала вячэрнія рэтрансляцыі на частаце 1557 кілагерц. І першая перадача, і другая чуліся на “тройку”. Якасць прыёму цягам абодвух праграм не была стабільнай. У першым выпадку чутнасць пагоршылася пад канец выпуску, у другім – наадварот, палепшылася.
Уначы 25 красавіка прыём на частаце 612 кілагерц ацэнены на “троечку”.
На кароткай хвалі 25 метраў магіляўчанка злавіла нас 27 і 28 красавіка. Прыём быў на 3 і 4 балы. “Чутнасць трошкі палепшылася а 16.30,” – апісвае Яўгенія Цюркіна свае ўражанні ад праслухоўвання частаты 11975 кГц.
А як у вас, паважанае спадарства, з прыёмам? Ці стаў ён лепей у параўнанні з зімовым перыядам? Чакаю вашых водгукаў у лістах і рапартах.
Напамінаю, што наша станцыя працуе на кароткіх хвалях у дыяпазонах 25 і 31 метра. А 16.30 паводле менскага часу Варшаву чутно на частотах 9440 і 11975 кГц. А 19.30 Польскае радыё для замежжа можна прыняць на дзевяці тысячах шасцістах сямідзесяці кілагерцах.
Віцяблянін Арцём Арашонак перадаў для вядучага літаратурнай перадачы, перакладчыка Чэслава Сэнюха свой уласны зборнік “Сэнр’ю”. Гэта вершы і кароткая проза, напісаныя маладым творцам паводле ўзораў японскай паэтычнай традыцыі.  
Міхаіл Шавель з Менска прыслаў заяўку ў “Канцэрт віншаванняў” і працу на гендэрны конкурс. Адказы пра беларусак поўныя, разгорнутыя, цікавыя і ў дастатковай колькасці. На жаль, замала прозвішчаў выбітных жанчын з Польшчы ды іншых краін. Але да канца траўня спадар Шавель яшчэ можа даслаць дадатковыя прапановы.
Нагадваю варункі ўдзелу ў гендэрным конкурсе.
Назавіце самаменш па пяць прозвішчаў славутых беларусак, вядомых полек і знакамітых жанчын зь любых іншых краін. Абгрунтуйце свой выбар. Шаноўныя сябры! Свае прапановы выбітных жанчын дасылайце не пазней за 31 траўня 2009 года. У чэрвені будуць падведзеныя вынікі. Пераможцы атрымаюць цікавыя ўзнагароды. Між іншым, ужо вядома, што ўяўляе сабой гран-пры конкурсу. Гэта –  каштоўная рэч. А, дакладней, радыёпрыёмнік “Grundig” з рознымі дыяпазонамі, у тым ліку з кароткімі хвалямі. За такую высакаякасную апаратуру варта пазмагацца! 
Калі хтосьці не паспеў запісаць конкурснае заданне, не хвалюйцеся. Яго тэкст можна знайсці на двух сайтах: www.schoolgender.do.am i www.gender.do.am. Гэта – Інтэрнет-старонкі міжнароднай гендэрнай праграмы “Крок да роўнасці”, якая фундуе конкурсныя ўзнагароды.
Паважаныя сябры! Беларускую рэдакцыю цікавяць вашыя заяўкі ў “Канцэрт віншаванняў” і лісты на самыя розныя тэмы.
Калі ласка, пішыце на наступны адрас Польскага радыё для замежжа: а/с 45, г. Віцебск, 210015, Беларусь.
Свае лісты вы можаце таксама накіроўваць непасрэдна ў рэдакцыю. Адрас гучыць так: Беларуская служба Польскага радыё для замежжа, P. О. Box 46, 00-977 Warszawa, Польшча.
Нашы палескія слухачы могуць адпраўляць свае пісьмы на адрас: абаненцкая скрынка 28/78, г. Вінніца, 21027, Украіна.
З намі таксама можна вельмі аператыўна кантактаваць па электроннай пошце. Рэдакцыйны e-mail гучыць так: by@polskieradio.pl.
Наша станцыя пастаянна прысутная ў Інтэрнеце. Таму, калі ласка, рэгулярна наведвайце наш рэдакцыйны сайт у Сеціве. Штодня тут можна знайсці самую разнастайную тэкставую ды гукавую інфармацыю, а таксама фотаздымкі пра падзеі і факты ў Польшчы, Беларусі, Еўропе ды свеце. Адрас старонкі ў Інтэрнеце: www.radyjo.net.